9.4. Teez Studio — контент жасау

Егер сізде біздің стандарттарымызға сай фотосуреттер болмаса, 2025 жылдың 31 шілдесіне дейін Teez Studio тауарларыңызды тегін суретке түсіріп немесе фотосуреттеріңізді өңдеп береді.

Teez Studio аз ақыға біздің стандарттар бойынша заманауи контент жасауға көмектеседі. Бұл сізді фотографтарды іздеуден, түсірілім мен өңдеуге тапсырыс беруден құтқарады. Неліктен біз контент жасауға дәл осындай тәсілді таңдағанымызды Teez дегеніміз не бөлімінде айтып бердік.

Тауардың алғашқы жеткізілімінен соң оның суреттері Тауарларды модерациялау бөліміндегі ережелерге сай модерациядан өтпесе, біз оған рендер жасаймыз немесе студияда суретке түсіреміз. Teez Studio суреттерді карточкаға жүктегенде, бұл фотосуреттерді өзгерту мүмкіндігі автоматты түрде жабылады.

Тауар фотосуреттерінің рендері

Егер сізде фото редакторлар арқылы түзетуге болатын стандарттардан сәл ауытқулары бар фотосурет болса, біз тауарды студияға апармаймыз және рендер жасаймыз.

Құны — бір SKU үшін 1 000 ₸, оған бастапқы суреттердің санатына, сапасына және санына байланысты 5 кадрға дейін өңдеу кіреді.

Біз сіздің фотосуреттеріңізден рендер жасай алуымыз үшін олар бірнеше критерийлерге сәйкес келуі керек:

• Фотосурет форматы — PNG, JPEG, JPG, WEBP.

• Минималды ажыратымдылық — 600 × 600 пиксель.

• Фотосуреттердің фоны біркелкі ақ немесе ашық сұр. Тауар интерьерлік суреттер рұқсат етілетін санатқа жатса, бұл талап міндетті емес.

• Суреттер шуылсыз және фокустың ауытқуынсыз, жақсы сапада болуы тиіс.

• Фотосуреттерде мәтіндер, суреттер, су белгілері, көрсеткіштер және тауарды жауып қалатын заттар болмауы керек. Ерекше жағдай — тауардың функционалын көрсетуге көмектесетін реквизиттер.

• Тауардың кем дегенде бір фотосуреті алдыңғы жағынан толық көрінуі керек.

Тауарды суретке түсіру

Егер сізде фотосуреттер болмаса немесе оларды өңдеу арқылы біздің стандарттарымызға сәйкестендіру мүмкін болмаса, қоймадағы алғашқы қабылдаудан кейін біз әрбір жаңа SKU-дың бір бірлігін суретке түсіру үшін Teez Studio-ға әкетеміз.

Тауарды өз стандарттарымыз бойынша заттық суретке түсіреміз: модельсіз, ашық фонда және белгілі бір ракурстарда. Teez Studio-да киім, аяқ киім және аксессуарларды да біз тек заттай түсіреміз. Тауар тартымды көрінуі үшін, жануарлардың манекендерін, жастықтарды, құмыраларды және т. б. қолданамыз және тұрақты түрде сатып аламыз.

Құны — бір SKU үшін 1 500 ₸, оған санатына байланысты 3-тен 5 кадрға дейін түсіру және өңдеу кіреді.

Түсірілімнен соң, біз тауар қаптамасын қалпына келтіріп, оны сатылымға жібереміз.

Тауарларды түсіруге қойылатын шектеулер

Кейбір тауарларды студияда түсіре алмаймыз, сол себепті олар модерациядан өтетіндей немесе біз рендер жасай алатындай етіп, сапалы суреттерін жүктеу қажет. Мұндай тауарларға келесілер жатады:

• функционалын толық көрсету үшін қалпына келтірілмейтін қаптаманы ашу қажет болатын;

• өлшемі 180 × 100 × 180 см (ұзындығы × ені × биіктігі) артық;

• салмағы 10 кг артық;

• құралдардың көмегімен құрастыруды қажет ететін;

• қымбат бағалы техника.

Сонымен қатар, біз сіз тауармен бірге беретін сыйлықтарыңызды суретке түсірмейміз. Мысалы, егер сіз шағын магнитті шыршаға сыйлық ретінде салсаңыз, біз тек негізгі тауарды суретке түсіреміз. Бұл сіздің карточкаңыздың бұғатталмауы үшін жасалады, егер келесі жеткізілімде тауар басқа бонуспен немесе онсыз келсе.

Жекелеген тауар санаттарының фотосуреттерін өңдеу ерекшеліктері

Біз тауарды тиімді жағынан көрсету қаншалықты маңызды екенін түсінеміз. Сол себепті кейбір тауар санаттары үшін фотосуреттерді өңдеудің ерекше шарттарын енгіздік.

Интерьерлік суреттер

Суреттер сапалы және үй жағдайында жасалмаса, кейбір тауарлар санаттарында интерьердегі көрінісін көрсетуге болады:

• төсек-орын тоқыма бұйымдары: төсек-орын жабдығы, матрастар, көрпе, матрасқаптар, балдахиндер, ернеулер;

• жиһазға арналған қаптар;

• дастархандар;

• терезе үлдірлері, перделер, жалюзи;

• едендік және қабырғалық айналар;

• түсқағаздар мен интерьерлік жапсырмалар;

• автокөлік тысқаптары, жапқыштар, матрастар;

• әуе шарларының жиынтығы;

• жасанды шыршалар, жиынтыққа кірмейтін безендірулері болмаған жағдайда;

• гирляндалар.

Сайттағы біркелкілікті сақтау үшін интерьер фотосуреттерінің шеттеріне #efefef реңкінде шегіністер қосамыз.

Палитрасы бар фотосуреттер

Кейбір санаттар үшін фотосуреттерді өңдеу кезінде біз тауардың түсін көрсету үшін негізгі кадрға палитра қосамыз:

• декоративті косметика: қарындаштар, көз сүрмелері, ерін далабы, реңктік құралдар, тушь және т. б.;

• тырнаққа арналған лактар мен гель-лактар;

• бояулар, пигменттер, колерлер (декоративті, интерьерге арналған, шашқа арналған).

Егер тауар қаптамасының суретінде оның реңкі көрінсе, палитра қоспаймыз.

Біздің палитрасы бар кадр жасауымыз үшін алғашқы жеткізілім алдында карточкаға тауардың реңкі көрінетін фотосуретті жүктеңіз. Егер Teez Studio палитрасыз дайын фотосуреттерді жүктеп қойған болса, серіктестерді қолдау қызметіне жазыңыз — сұраныс бойынша сіздің фотосуреттіңізден жасап береміз.

---